Добрата порака го наоѓа патот и развива комуникација

Деновиве на Интернет, особено на Facebook може да се забележи заедничката кампања на Црвениот крст и Dormeo. Зад Dormeo стои Студио Модерна, компанија која во послено време заслужува голема пофалба за ниваните Интернет кампањи. Мотивацијата да поразговарам со нив потекнува уште од кампањата која ја реализираа за денот на вљубените, но ете изгеледа Разбудете се хумани беше вистинкото време и финалниот мотиватор. Спремивме (јас и Нате) неколку прашања на кои со задоволство се нафати да одговори Ана Бојаџиева од Студио Модерна Скопје.

• 120 Душеци за две недели. Честитки. Дали е ова резулат само на интернет кампањата или станува збор за интегрирана кампања? Ако е интегрирана, колкав е делот/уделот на интернет делот?

Благодарам. Се радуваме и што бројот на донации постојано се зголемува, а тоа значи дека заедно со Црвен Крст и сите оние кои донираа можеме да им помогнеме на голем број граѓани да имаат поудобен и поквалитетен живот. Првата донација во петок (6.11.2009) ќе ја добијат старите лица од домот „Мајка Тереза“ во Скопје, а ние нестрпливо го чекаме тој момент. И се разбира, акцијата ќе продолжи понатаму за повеќе такви моменти.
Идејата на „Разбудете се хумани“ беше токму будењето на хуманоста, па за да допреме до што поголем број на граѓани се одлучивме за интегрирана кампања во која вклучивме ТВ, Интернет, Принт. Интернет делот, ако го мериме според она што ни беше најважно, а тоа е секако бројот на донации, изнесува 40%. Но, ако малку пошироко гледаме на целата кампања, ќе видиме дека не се работи за мерлив дел или влијание. Дали со интернет кампањата сме помогнале во подигање на свеста? Тоа да, сигурно. Е-маил пораките за поддршка кои ги добиваме, како и бројот на донации преку веб-страницата го потврдуваат тоа. Но, дали некој се одлучил да донира преку веб-страницата поради интернет кампањата или ТВ спотот, добиениот флаер, видениот постер? Тоа не можеме да го знаеме. Исто така, има и многу кои дознале за „Разбудете се хумани“ од Интернет, а сепак се одлучиле да се јават на 02/3094 555 (тел. број за донации) и да донираат на тој начин. На крајот, начинот не е толку важен, колку што е важна целта – да им се помогне на што повеќе луѓе.

• Што вели вашето искуство кога зборуваме за ефективност на Интернет кампањите во Македонија? Кој е клучот за успешна Интернет кампања?

Моето скромно досегашно искуство ми покажало дека Интернет прозорецот нема само еден клуч, туку дека тие се повеќе. А и динамично се менуваат. Досегашниот ефект на „Разбудете се хумани“, според мене, се должи на пораката, на која добиваме одговори. И така гледам и на останатите кампањи – ако пораката допре до мене и ме натера да делувам, тогаш кампањата е успешна. Повторно, не е важно колку, какви банери имало и на која позиција…добрата порака го наоѓа патот и развива комуникација.

• Колку време и колкав тим се потребни за креирање и спроведување на една квалитетна Интернет кампања во Македонија? Што е неопходно да се има како позадинска поддршка?

Сѐ е позадинска поддршка кога се интернет кампањите во прашање ☺. Кога креираме една кампања, поаѓаме од идејата и ја бараме најсоодветната порака.

И на тоа го посветуваме најголемиот дел од времето. Без разлика на функцијата – креативец, дизајнер, програмер, во овој процес е вклучен целиот тим бидејќи токму тимот е она „неопходното“ за квалитетна кампања. За „Разбудете се хумани“, морам да кажам, сите имавме некаква посебна енергија и сѐ одеше брзо и лесно. Но, креирањето на една кампања на запира на нејзиниот старт – таа треба да се следи и доколку има потреба – да се менува и додека трае.

• Вашите реклами често се поткрепени со стории од задоволни корисници. Која е тајнта, ако е воопшто тајна, во процеот на поттикнување на мотивацијата на корисниците да ги споделат своите стории?

Нема тајна. Многу од задоволните корисници (особено на производите од програмите на Космодиск и Дормео) сами ни се јавуваат да го споделат своето задоволство и да ни кажат дека веќе го препорачале производот на своите пријатели. И мислам дека ова не е чудно за средина каква што е нашата. Сите го правиме тоа – препорачуваме што ни се допаднало и им веруваме на пријателите кога ќе ни дадат некаква препорака. Кога нѐ контактираат задоволните корисници, наше е да ги прашаме дали сакаат тоа да го споделат и со пошироката јавност. И секогаш, оние на кои не им е непријатно од камерите, со задоволство прифаќаат.

• Имате ли некоја препорака за останатите кои не собрале храброст и не стекнале искуство и знаење за имплментација на Интернет кампања во Македонија?

Ова е навистина тешко прашање, а јас изгледа повторно ќе треба да ја споменам пораката ☺ бидејќи сметам дека комуникацијата со он-лајн публиката е најважна. За стекнување знаење и искуство е потребно време, но доброто нешто на овој медиум е што ги наградува свежите идеи, реализирани на нов, поинаков начин. Целната група лесно може да се лоцира, слични кампањи да се „сурфнат“, темплејти и туроријал-и се достапни на едно кликање. Но, Вашата порака кажана на Ваш начин ја прави разликата.

Фала Ана

No related posts.