Како го најдовте вашиот аранжман?

Во екот на летните понуди, како и сите луѓе, загреани сте да најдете аранжман за вашиот одмор и да ја изберете понудата која најмногу одговара на вашите желби и буџет. Јас, согласно на мојата професија, не ни помислив дека ќе трчам од агенција до агенција да собирам понуди, туку си отворив прелистувач и почнав да си пребарувам.

Епа ајде да видиме како нашите туристички агенции се листаат на неколку најпопуларни клучни зборови за ова лето и колку од нив можат да гарантираат дека ќе добијат клиенти преку Интернет каналот.

1. Клучен збор: Туристички агенции

Освен неколку сајтови кои нудат листи на туристички агенции во Македонија, на првата страна на Google за овој клучен збор се листаат следниве агенции:

• Игуана;
• Гранада;
• Атлас Плус;
• Фибула.

Додека првите 3 агенции од горенаведените во својот мета таг го имаат вклучено клучниот збор, Фибула има различни клучни зборови. Меѓутоа ако се направи подетална анализа на страницата на Фибула и воедно на целокупната оптимизација, вклучувајќи ја и off-page оптимизацијата, се увидува дека Фибула многу подобро стои со бројот и квалитетот на надворешни страници кои линкуваат до нејзината во однос на останатите агенции. Бидејќи надворешните страници имаат содржина релевантна на овој клучен збор, Фибула се излистува на првата страница на Google и покрај тоа што не го вклучува овој клучен збор во својот мета таг.

2. Клучен збор: Летна понуда

Иако многу поразличен и поширок термин од првиот клучен збор, “летна понуда” е вториот збор кој го искористив во моето пребарување.  На мое големо изненадување, ниту една туристичка агенција не се појави на првата страна за оваа клучна фраза.

3. Клучен збор: Летни аранжмани

Според моите очекувања, хит за оваа клучна фраза е Грција. Меѓутоа не понудите за летување во Грција, туку информацијата која што скоро сите телевизии, дневни весници и портали ја пренесуваа минатииот месец: “Откажани петина од летните аранжмани во Грција”. Четири од десетте резултати на првата страница се портали кои ја пренесуваат оваа информација. Ова повторно е поврзано со бројот и квалитетот на надворешни линковите кои се линкувани до овие вести, што им овозможува на порталите да се излистаат во првите резултати на пребарувачот.

Само две туристички агенции се излистани на оваа фраза:

• АрбоТравел;
• АМСМ Турс.

4. Клучен збор: Лето 2010

Со оваа фраза веќе ситуацијата е спротивна. Седум од десетте први резултати се туристички агенции при што веројатноста да го пронајдете она што всушност го барате е непогрешлива. Имате голем избор на понуди и лесно е да се одлучите која е соодветна за вас.

Моето пребрување заврши овде. За среќа јас го најдов мојот аранжман. Меѓутоа ајде подетално да ги разгледаме заклучоците. Од 363 туристички агенции (колку што се излистани на Златна Книга), само десеттина од нив стигнаа до мене и успеаа да ми ги презентираат нивните понуди. Како што кажав на почетокот, во никој случај нема да ми падне на памет да одам од агенција до агенција и да собирам понуди, а можеби токму некоја друга понуда е многу попримамлива и посоодветна за мене. Но бидејќи таа не стигнала до мене, ќе остане неискористена. Во овој случај губам и јас како потрошувач, но агенцијата која не се излистала на моето пребарување автоматски ме губи мене како клиент. Единствена светла точка за овие агенции се останатите директориуми кои ги вклучуваат повеќето агенции во своите листи и кои на одредени клучни зборови котираат високо.

Дали и вие се одлучувате за вашиот одмор на истиов начин? Кои се клучните зборови по кои пребарувате? Какви резултати добивте по пребарувањето?